1- 800 - 22 - UNITE

Bahá'í Fedeari buruzko informazioa Estatu Batuetan

Bahá'í-ak

magazinari buruz

Zaindariaren aroa

1921eko azaroaren 28an, ‘Abdu’l-Bahá lasaitasun osoz hil zen lo zegoen bitartean. Bere aita bezalaxe, ‘Abdu’l-Bahá kezkatuta zegoen Bere heriotzaren ondoren gerta zitekeen zisma baten arriskuaz. Beraz, Hark ere Testamendu argi eta esplizitu bat utzi zuen idatzita, Bahá’u’lláhk ezarritako Hitzarmena zabaldu egiten duena.  

Bere agirian, ‘Abdu’l-Bahák Bere biloba Shoghi Effendi izendatzen zuen ondorengo, Bahá’í Fedearen Zaindari gisa. Zaindaritza erakundea Bahá’u’lláhk Berak aurreikusitakoa zen.  

Bere funtzioak betetzean, Shoghi Effendi bahá’í irakaspenen interprete baimendu gisa ari zen. Shoghi Effendi Akreko San Joanen jaio zen 1897ko martxoaren 1ean. Bere haurtzaroko zati handi bat ‘Abdu’l-Baháren alboan eman zuen. Beiruteko Unibertsitate Amerikarrean ikasi zuen, eta ondoren, Ingalaterrako Oxford Unibertsitatean. Heziketa hari esker, aise menderatu zuen ingeles hizkuntza, eta mendebaleko kulturaren ezagupen handia lortu.  

Shoghi Effendiren ministerioan zehar, Bahá’í Fedea benetako erlijio global bilakatu zen. ‘Abdu’l-Bahá hil zenean 100.000 bahá’í inguru zeuden, gehienak Iranen edo Ekialde Hurbileko herrialdeetan bizi ziren iraniarrak. Jarraitzaile gutxi batzuk Indian, Europan eta Iparramerikan bizi ziren. Guztira, 35 herrialdetan zeuden bahá’í fededunak. Shoghi Effendi 1957an hiltzean, alegia, 36 urte ondoren, bahá’í-en kopurua 400.000ra igoa zen, eta 250 herrialde, lurralde eta koloniatan bizi ziren.  

Shoghi Effendiren gutunek arauak ematen zituzten hautes prozesuaz eta talde mailako erabaki hartzeaz, Bahá’í Fedearen ezaugarriak baitira. Garai hartan abiatzen ari ziren bahá’í erakundeei ere idatzi zizkien gutunak. Haietan gai sorta oso zabal batean Bahá’u’lláhren irakaspenek zituzten ondorioak esplikatzen zituen, gaiak famili bizitzatik munduko gobernuraino joan zitezkeelarik. Argitu egin zituen Bahá’í Fedeak beste erlijio eta doktrinekin zituen harremanak. Haren idazkiek, zuhurrak eta zorrotzak, argitu egin zuten bahá’í ikuspuntua arazo moral, teologiko eta historikoetan. 

Baina gutun haietan, beharbada, garrantzitsuena Fedearen hazkundeari dagokionez zera da, haiei esker bahá’í munduak laguntza iturri etengabe bat eskuratu zuela. Bahá’í Fedea gaur egun denek begirunez ikusten badute ere, hogeita hamar, berrogei eta berrogeita hamargarren hamarkadetan edozein bahá’í susmagarri izan edo barregarritzat hartua izateko arriskuan zegoen. 

Shoghi Effendik Bahá’í Fedea garai honetarako Jainkoaren errebelazio gisa aurkeztean izan zuen ikuspen argitasunak eta finean garaile geratuko zela halako konbikzio sendoz sinesteak indarra eman zioten sinesle belaunaldi berri bati, zeina kopuruari dagokionez eskasa izan arren, Bahá’u’lláh-ren mezua munduko bazter guztietara zabaltzeko ardura izan baitzuen. 

Justizia Etxe Unibertsala

Shoghi Effendi 1957an hiltzean, Fedeak toki eta nazio mailako Batzar Izpiritual kopuru nahikoa zeukan Justizia Etxe Unibertsala, hots, Bahá’u’lláh-k aurreikusitako nazioarteko gobernu erakundea, hautatzeko. 

Bahá’í-entzat, 1963ko apirilaren 1ean halako itxaropena piztu zuen Justizia Etxe Unibertsala abiatzea garrantzi izugarrizko gertakaria izan zen. Bahá’u’lláh-k agindua baitzuen Berak sortutako erakunde hura hutsik gabe gidatuko zuela bere erabakietan. 
 

Urte hartan boto sekretoz hautatutako bederatzi kideak lau kontinentetatik zetozen, hiru tradizio erlijioso handitatik (judua, musulmana eta kristaua) eta jatorri etniko desberdinetakoak ziren. Harrez geroztik, Justizia Etxe Unibertsalerako hauteskundeak bost urtero egin izan dira [Ikus 46. orrialdea]. 

Bahá’í Fedearen erakunde gorena den aldetik, Justizia Etxe Unibertsalak mundu osoko Bahá’í Erkidegoaren hazkunde eta garapena zuzentzeko egitekoa hartu zuen bere gain. Hori lortzeko, plan sorta bat formulatu zuen, bakoitzak hiru eta bederatzi urteen arteko iraupena zuelarik, baita hedapen eta aintzatespen mailako zenbait helburu jakin ezarri ere. 

1963an, Bahá’í Fedeak 400.000 sinesle inguru zeuzkan. Bahá’í-ak 11.000 lekutan zeuden finkatuta, nazio eta eskualde mailako 56 komunitatetan antolatuta. 1992an 5.000.000 bahá’í inguru zeuden, 116.000tik gora lekutan finkatuta eta nazio mailako 165 erkidegotan antolatuta.

"Bahá'í-ak, Nazioarteko Bahá'í Erkidegoaren publikaziotik hartutako testua".

Atzera  |  Gora |  Hurrengora

Shoghi Effendi

In April 1963, some 6,000 Bahá'ís gathered in London's Royal Albert Hall for the First Bahá'í World Congress, a celebration of the 100th anniversary of the inauguration of Bahá'u'lláh's mission.