Zenbat bahá'í dira mundu osoan?

Mundu mailako edozein erlijioren jarraitzaileen kopurua kalkulatzea lan konplexu eta zaila da, inondik ere. Munduko zenbait aldetan, jazarpen erlijiosoaren edo Gobernuaren zapalkuntzaren ondorioz pertsonak ez dira identifikatzen norabide jakin batean. Beste leku batzuetan, datu bilketa zaila izaten da komunikazio eta antolamenduzko arazoak direla medio.

Zailtasun hauek gogoan zituztela, Bahá’í Mundu Zentroko demografoak saiatu dira beren estimazioetan ahalik eta modu kontserbadoreenean jokatzen. 1991n egin zuten inkestak ematen duen kopurua 5,000.000 ingurukoa da guztira.

Kalkulaketa horiek apaltasunez egin direla agerian jartzen da datu horiek beste iturri espezializatuenekin parekatzen direnean. Esaterako, Encyclopædia Britannicaren 1992ri dagokion Urtekariaren arabera, 5,400.000 bahá’í inguru zeuden 1991n.

Azken hiru hamarkadetan, bahá’í-en kopurua izugarri areagotu da. Kalkulatzen da 1963an, Bahá’í-en Lehenbiziko Mundu Batzarrearen urtean, 400.000 bahá’í inguru zeudela. 1985erako, kopurua 3,500.000ra iritsi zen.

Bestela esanda, azken sei urteetan Bahá’í Fedeari 1,500.000 sinesle atxiki zaizkio; horrek esan nahi du hazkundea %43 ingurukoa izan dela.

Ñabardurak beharrezkoak dira Bahá’í Fedearen hazkunde indizea beste erlijioen indizearekin alderatzean. Bahá’í demografoek beste erlijioei buruzko estatistikarik egiten ez dutenez, ez dirudi zuzena gisa honetako konparazioa formulatzea.

3.63%	Bahá'í Fedea
2.74%	Islama
2.30%	Hinduismoa
1.67%	Budismoa
1.64%	Kristautasuna
1.09%	Judaismoa

Nolanahi ere, World Christian Encyclopædia (Mundu Entziklopedia Kristaua) delakoaren estatistikek, agian alor honetan gehien errespetatzen den iturria, erakusten dute Bahá’í Fedea hazkunderik bizkorrena duten munduko erlijio independenteen artean dagoela. Aipatu iturriak kalkulatzen du bahá’í erkidegoa munduan zehar %3,63ko erritmoari jarraiki hazi zela 1970 eta 1985 arteko 15 urteetan.

Datu horiek 1982an, eta 10 urte (1970etik 1980ra) iraun zuen ikerketa baten fruitu gisa, demografo kristau talde batek argitaratu zuen lanean oinarritzen dira, ikerketaren helburua herrialde bakoitzean kristauen eta beste erlijioetako sinesleen kopurua zehaztu eta hazkunde proiekzio bat finkatzea zelarik. World Christian Encyclopædiak ekarritako datu konparatiboak orrialde honetako grafikoan agertzen dira.

Nahiz datu horiek zaharrak izan, 10 urtekoak, gaur egun ez dago bestelako datu konparatibo fidagarririk erlijio desberdinen hazkunde indizeei buruz.

Komenigarria da, alabaina, emaitzei ñabardurak eranstea. World Christian Encyclopædiak berak dioenez, zenbait sekta eta azpibanaketa kristau eta musulmanetan izandako hazkundea Bahá’í Fedearena baino handiagoa izan zen. Hala ere, aipatutako sekta edo azpibanaketa horietatik ezein ez zegoen finkatuta 100 herrialde baino gehiagotan. Iturri beraren arabera, 1982an (ikerketa argitaratu zen urtea), Bahá’í Fedeak 192tik gora herrialdetan zeukan komunitate kopuru “dezentea”

Dauzkagun zifra berrienak Encyclopædia Britannicaren Urtekariak emandakoak dira. Haien arabera, Bahá’í Fedea ongi finkatuta dago 205etik gora herrialde eta lurraldetan, eta horrek bigarren lekuan ezartzen du, barreiadura geografikoari dagokionez, erlijio kristauaren ondoren.

Bahá’í Mundu Zentroko estatistikariek kalkulatzen dute 1992an Bahá’í Fedea 232 herrialde eta mendeko lurraldetan zegoela finkatuta.