1- 800 - 22 - UNITE

Bahá'í Fedeari buruzko informazioa Estatu Batuetan

Bahá'í-ak

magazinari buruz

Erlijioa eta aldaketa soziala

Historikoki, erlijioa agenterik indartsuenetako bat izan da pertsonen portaera eta jarreren aldaketa errazteko orduan. Tradizionalki, erlijioak pertsona izatea zertan den definitzen du, baita gure xede eta harremanen izaera ere. Eta hementxe -portaera aldaketari dagokionez- ekartzen dituzte bahá’í planteamenduek itxaropen handienak garapen, hezkuntza eta inguramenaren kontserbazioaren arazoak konpontzeko orduan.

Bahá’í erkidegoaren baliabide materialak mugatuak direnez, proiektu gehienak apalak dira, eta tokiko esparruan zentratzen dira.

Alabaina, tipikoki bahá’í-ak dira proiektuok, bai sorkuntzari bai gauzatzeko moduari dagokienez. Proiektu gehienak, zuzenean nahiz zeharka, gizateriaren batasuna sustatzera daude bideratuta. Askok emakumearen estatusa jasotzearen premia azpimarratzen dute. Asko bazterkeria jasan duten gutxiengoen zerbitzura daude. Gehienak kontsulta printzipioaz baliatzen dira onuradunei autonomia emateko eta haien lankidetza segurtatzeko. Oro har, emaitzak ekintza sozioekonomikorako eredu global eta integratu berri bat erakusten du.

Indoreko (India) Landetako Emakumearentzat Lanbide Heziketa Institutua

Indian, adibidez, bertako bahá’í erkidegoak garapen proiektu askori heldu die, bereziki heziketa zentroei. Haietako bat da Landetako Emakumearentzako Lanbide Heziketa Institutua, Indoren kokatua (Madhya Pradesh estatuan). Bertan dohainik ematen zaizkie alfabetizazio eta lanbide heziketa eskolak emakume gazte behartsuei.

Institutua eremu zabal bateko herriskez arduratzen da, haietara bideratzen saiatzen delarik inguruko merkatuetarako erabilgarriak izan daitezkeen trebeziak. Hala ere, bahá’í-en babespeko beste zenbait proiektutan bezala, ez dira falta hezkuntza izpiritual eta moralezko osagaiak, zeinek asko laguntzen baitiote Instituaren eraginkortasunari.

“Alfabetizazioa eta lanbide eta osasun heziketa funtsezkoak badira ere, uste dugu Institutuaren ekarpen behinekoena gazteek gizaki gisa duten gaitasun osoa aitor dezaten laguntzea dela”, dio Institutuaren zuzendari den Janak Palta McGilligan-ek. “Hortxe sartzen da faktore morala”.

Heziketa izpiritual eta moralaren curriculumak gizon-emakumeen arteko berdintasuna, gizateriaren batasuna eta bihotz garbi bat eta motibazio desinteresatuak izatearen garrantzia azpimarratzen ditu. Printzipio horiexek aurkitzen dira garapen pertsonalerako motibazioaren atzean.

“Konfiantza ematen ahalegintzen gara, pertsona oso garrantzikoak direla eta beren etxeen hobekuntzan eta bere herrisken garapenean paper oso nabarmena egin dezaketela jakin dezaten”, azaltzen du Tahirih K. Vadji, Institutuaren fundatzaileetako bat eta Indiako Bahá’í Nazio Batzarreko kideak. “Egia esan, jakin ahal izan dugu gazte horiek itzultzen direnean beren komunitateetan eragina dutela. Osasun eta higieneari buruzko ideia berriekin itzultzen dira, haurren heziketa bultzatzen dutelarik”.

1992ko ekainean Institutuari Nazio Batuetako Inguramen Programak ematen duen Global 500 saria eman zioten. Entrega agirian honako hau irakur zitekeen:

“1987z geroztik, Landetako Emakumearentzako Lanbide Heziketa Institutuak hiru programa abiarazi ditu emakume nekazariak hezitzeko Indiako Erdialdean uren kutsadurak sortutako Gineako larben izurriteari aurre egiteko (...). Programa hasi zenean, 752 pertsona zeuden infektatuta, eta 210.000 arriskuan zeuden. Gaur egun, Gineako larbak erabat erauzi dituzte eskualdetik”.  jarraitzen da

"Bahá'í-ak, Nazioarteko Bahá'í Erkidegoaren publikaziotik hartutako testua".

Atzera  |  Gora |  Hurrengora

Kivu probintziako (Zaire) lehen mailako bahá’í eskola.

Erabakiak hartzeko orduan kontsulta erabiltzea nahitaezkoa da garapen proiektu bahá’í guztietan. Irudian, Namibiako bahá’í talde bat kontsulta prozesuan murgilduta.

Indoreko (India) Landetako Emakumearentzako Lanbide Heziketa Institutuko langileak.