1- 800 - 22 - UNITE

Bahá'í Fedeari buruzko informazioa Estatu Batuetan

Bahá'í-ak

magazinari buruz

El Chaco-ko proiektua

Bahá’í-ak zenbait proiektu berezi zuzentzen edo babesten ari dira Bolivian, hala nola Dorothy Baker Inguramen Ikerketa Zentroa, zeinari esker Primo Pacsik haurtzaindegia ezarri ahal izan baitzuen goi lautadetako herrixka urrun batean. [Ikus 12-13 orrialdeak]

Hegoekialdeko Boliviako lur beheretan, El Chaco eskualdean, bahá’í-ak parte hartzen ari dira luzaro ahaztuta egon den biztanlego baten izaera eta balioa potentziatzeko asmoz egindako proiektu batean. Partehartzaileak, gehienbat, nekazari behartsuak dira, eta programa horrek heziketa tekniko, antolakuntza komunitarioa eta ideal izpiritualak eskaintzen dizkie.

Bahá’í printzipioetan oinarrituz, Chaco proiektuak pertsonaren garapena sustatzen du. Trebakuntzaren parte handi bat teknikoa izan arren -esate baterako, irakasten da onddoei aurre egin diezaieketen zitrikoak landatzen, proteina balore garaiko artoa landatzen edo azienda txertatzen-, ahaleginaren parte oso berezi eta osagarri baten helburua da trebakuntza eskaintzea beste zenbait gaitan ere, hala nola komunitate antolakuntza eta kontsulta bezalako erabakiak hartzeko tekniketan.

Guztiaren helburua nolabaiteko autosufizientzia maila sortzea da, komunitate mailako sentsibilizazioaren bidez kanpoko laguntza eta aholkularitzarekiko dependentzia urritu ahal izateko.

Ikuspegi honen funtsezko osagaien artean dago irakaspenetan printzipio moraletan oinarritutako heziketa ematea. “Pertsonak zintzoak ez badira, kontularitzaren irakaspenak lagunduko die soil-soilik beren zintzotasun eza modu eraginkorrago batez praktikatzen”, azaltzen du Garth Pollack-ek, proiektuaren zuzendaria izan zena 1988tik 1990 arte. “Beraz, gure eskoletan zintzotasunaz mintzatzen gara, zerbitzuaz eta komunitatearen batasunaz”.
 

Proiektuaren parte berezi baten xedea da lidergo ideal berri bat bultzatzea, neurri handi batean bahá’í kontzeptuetan oinarritutako ideala. “Gure ikuspuntuaren sustraia denok giza familiaren partea garelako ideia da”, dio egun proiektuaren zuzendaria den Ken Roedell-ek. “Pertsonei adorea ematen saiatzen ari gara beren komunitateen zerbitzari bilaka daitezen. Hori da guretzat komunitate lider baten definizioa: zerbitzatzen duen pertsona bat, ez zerbitzatu beharreko pertsona bat”.

Afrikako osasun arretaren landasare bat

Txad-eko bahá’í-ek lehen mailako osasun arreta sare bat ezarri dute, zeina onuragarria baita herrialdeko herrixka urrunenentzat. Sareak Sarh-en du egoitza zentrala eta bertan parte hartzen duten tokikoak trebatuta daude lehen arretarako tekniketan: txertoak, lehen sorospenak, haurren beherakoak (askotan hilgarriak) geldiaraztea, malariaren aurkako arretak...
 

Proiektua eskualdeko bahá’í kopuru handi samar batean oinarritzen da, haiek, beren tokiko Batzar Izpiritualen bidez, komunikazio sarearen lan eraginkor eta motibatua errazten baitute. Herrisketan zerbitzua ematen duten bahá’í osasun langileak beren tokiko komunitateek aukeratutako bolondresak dira. Osasun mailako heziketan, zerbitzuaren ideala nabarmentzen da (izan ere, bahá’í-en artean hori gurtza mota bat baita).

Tokiko Batzar Izpiritualarekiko kontsultak sendotu egiten du bolondresaren desioa, eta adore ematen du komunitateak bere osasun baldintzak hobe ditzan. Faktore konbinazio horren ondorioz, Txadeko eta beste zenbait herrialde afrikarretako osasun langileen huts egite indizea antzeko beste programetan gertatzen dena baino askoz apalagoa da.

“Afrikako zenbait herrialdetan, lanean huts egite indizea gobernu programetan %40 eta %70 artean dago”, esaten du Ethel Martens doktoreak. Afrika eta Asiako zenbait bahá’í erkidegorekin lan egin duen osasun arretan espezializatutako bahá’í kanadiar honek jarraitzen du, “Bahá’í proiektuetan, bi urtetan izan den indizea %2 eta %5 artean dago. Keniako proiektu batean bi lagunek huts egin zuten 40 langileren artean. Zanbian 19 langilek huts egin zuten. Bahá’í proiektuek agerian uzten duten diferentzia trebakuntza tailerretan partehartze metodoen erabileran datza”.
 

Bahá’u’lláhk argibide zehatzak eman zituen aurrerabidea eta aldaketa soziala gauzatzeko moduaz. Modu berezian azpimarratu zuen ekintzen garrantzia hitzen aldean. “Ez zaitezte arduratu zeuen irrikez; zuzen itzazue zeuen pentsamenduak gizateriaren patua bere onera ekarri eta gizakien arima eta bihotzak santutzen dituzten gauzetara”, idatzi zuen Bahá’u’lláhk. “Hori lortzeko modurik onena da ekintza garbi eta santuen bidez, bizitza bertutetsu eta portaera bidezko batez”.

Zerbitzu desinteresatuaren ideia hau Bahá’í ideal sozial eta printzipio administratiboekin konbinatzean, jarduketa sozialeko eredu berri bat sortzen da. Eredu horrek barne hartzen du kontsultaren erabilera komunitate mailan adostasuna eta batasuna ezartzeko; norberaren autonomia eta potentziazio maila ahalik handiena lortzean jartzen du garrantzia, eta adorea ematen du arazo sozialen eta haien kausen ulermenerako ikuspuntu holistiko bat aplikatzeko.

Bahá’í-ek garapen mailan egindako ahaleginek egungo kezka nagusiei -inguramena, hezkuntza eta osasuna- aurre egiten diete, baina horrezaz gain saiatzen dira halaber giza izpiritua zuzpertzen eta edozein jatorri etniko, erlijioso edo nazionaleko gizonen eta emakumeen arteko lankidetza harmoniatsua eragozten duten oztopoak baztertzen.

Datozen orrietan:

• Garapen ekonomiko eta sozialeko proiektuen hazkundea [64. orr.]
• Mundu mailako kanpaina bakearen alde [70. orr.]
• Mundu bakearen promesa [71. orr.]

"Bahá'í-ak, Nazioarteko Bahá'í Erkidegoaren publikaziotik hartutako testua".

Atzera  |  Gora |  Hurrengora

El Chacoko (Bolivia) proiektuaren helmuga heziketaren bidez autogarapena sustatzea da, ez soilik nekazal teknika berrien heziketaz, baita erabaki hartze komunitarioa bultzatuz ere. Argazkian, Andrés Fernández (ezk.) eta Rufino Tejerina (esk.), proiektuko zenbait tailerretako partaideak agertzen dira, aurrean arbola zitriko gazteak eguzkitik babesteko egindako banbu eta banana hostozko egitura ikusten delarik.

Zenbait bahá’í komunitatek irratiak zuzentzen dituzte -argazkian, Ekuadorreko bat-, emisora komertzialik ez duten eskualdeetara iristen ahaleginduz. Programazioan denetarik dago: musika, zerbitzu komunitario, hezkuntza, osasun eta kultura mailako saioak (emisorek, adibidez, nekazal landaketei buruzko ideia praktikoak eskaintzen dituzte). Gaur egun zazpi irrati bahá’í daude: bost Latinoamerikan, bat Iparramerikan eta beste bat Afrikan. Latinoamerikako bost irratiek bertako hizkuntzen erabilera zabala egiten dute, eta horrek lagundu egiten du eskualde bakoitzeko kultur identitateari eusten.

Bahá’í erkidegoak babestutako eskoletako bat, haren helburua landetako osasun langileak trebatzea delarik. (Txad)