1- 800 - 22 - UNITE

Bahá'í Fedeari buruzko informazioa Estatu Batuetan

Bahá'í-ak

magazinari buruz

“Nazioen arteko areriotasunak, gorrotoak eta azpijokoak bertan behera geldituko dira (...)”

MENDE HONETAKO 30. HAMARKADAN SHOGHI EFFENDIK MUNDU BERRIAREN IKUSPENA LABURBILDU ZUEN SARRI ASKOTAN AIPATZEN DEN MENDEBALDEKO BAHÁ’Í-EI ZUZENDUTAKO GUTUN BATEAN

Gizateriaren batasunak, Bahá’u’lláhk ikusi zuen moduan, berarekin dakar nazioek osatutako mundu mankomunitate bat zeinean arraza, sinesmen, nazio eta klase guztiak estuki eta betiko lotuta egongo baitira, estatu kideen autonomia, baita haiek osatzen dituzten pertsonen askatasun eta ekimen indibiduala behin betikoz eta osoki gordeko direlarik. Gure ikuspena iristen deneraino, mundu mankomunitate horrek mundu mailako botere legegile bat izan behar du, eta hura osatzen dutenek, gizateriaren fideikomisarioak diren aldetik, nazio partaideen baliabide guztiak kontrolatu beharko dituzte, eta behar adina lege onetsi arraza eta herri guztien bizitza arautu, premiak bete eta harremanak berregokitzeko.

Botere exekutibo batek, nazioarteko Indar batzuen laguntzaz, dagozkion erabakiak gauzatuko ditu, botere legegileak onetsitako legeak betearazi, eta mankomunitate osoaren batasun organikoa babestuko du. Mundu mailako epaimahai batek epaitu eta bere ebazpena jaulkiko du sistema unibertsal hau osatzen dituzten elementu desberdinen artean sor litezkeen gatazka guztietan.

Mundu mailako komunikazio mekanismo batek planeta osoa hartuko du barne, eragozpen eta mugapen nazionaletatik aske, eta bizkortasun zoragarriz eta erregulartasun perfektoz funtzionatuko du. Mundu metropoli bat izango da zibilizazio planetario baten nerbio nagusi modura, haren fokurantz indar bateratzaileek jo beharko dutelarik eta haren izatetik bere indar biziemaleek hedatu beharko dutelarik. Mundu hizkuntza bat asmatu edo daudenen artean aukeratuko da, zeina nazio federatuetako eskola guztietan irakatsi beharko baita lekuan lekuko ama hizkuntzarekin batera. Idazkera sistema amankomunak, mundu literaturak, moneta, pisu eta neurri sistema uniforme eta unibertsalak... bakandu eta erraztu egingo dute gizateria osatzen duten nazio eta arrazen arteko tratu eta ulermena.

Halako gizarte batean, zientzia eta erlijioa, giza bizitzaren bi indar nagusiak, adiskidetu egingo dira, eta elkarlanean eta harmonian garatuko. Halako sistema batean prentsa, gizateriaren konbikzio eta ikuspuntu desberdinen adierazpenari hats emateaz gain, ez da jadanik egongo interes pribatu edo publikoek maltzurki manipulatuta, eta gatazkan dauden herri eta gobernuen eraginetik libre geratuko da. Munduko baliabide ekonomikoak erabat aprobetxatu eta erabiliko dira, merkatuak koordinatu eta garatu egingo dira, eta haien produktuen banaketa modu bidezko batez arautuko.

Nazioen arteko areriotasunak, gorrotoak eta azpijokoak bertan behera geldituko dira, eta arraza etsaitasun zein aurrejuzkuen ordez adiskidetasuna, lankidetza eta arraza arteko ulermena egongo dira. Gatazka erlijiosoaren kausak betiko erauziko dira, oztopo eta murrizte ekonomikoak betiko deuseztuko dira, eta ordenarik gabeko klaseen arteko bereizketa ezabatu egingo da. Alde batetik pobrezia, eta bestetik ondasun metatze handiak desagertu egingo dira. Gerran alferrik galtzen diren energia eskergak, ekonomikoak zein politikoak, beste zenbait xedetara bideratuko dira, hala nola: giza partehartzearen eta garapen teknikoaren esparrua zabaldu, gizateriaren produktibitatea areagotu, gaixotasunak errotik erauzi, ikerketa zientifikoak hedatu, osasun fisikoaren maila jaso, giza burmuina zorroztu eta findu, planetak gordetzen dituen baliabide erabili gabe edo susmagaitzak ustiatu, giza bizia luzatu eta giza espezie osoaren bizitza intelektual, moral eta izpirituala sustatuko duen edozein bitartekori bide eman.

Lur osoaren gainean agintea duen mundu sistema federal bat, bere baliabide itzel eta irudiezinen gainean autoritate eztabaidaezina duena; Ekialde zein mendebaldeko idealak bateratu eta txertatuko dituen sistema bat, gerra eta miseriaren madarikaziotik aske dagoena eta planetako energia iturburu guztiak aprobetxatzeko deliberatua; Indarra Justiziaren mendean egongo den sistema, zeinaren bizitzari eutsiko baitiote Jainko bakar baten aitorpen unibertsalak eta Errebelazio amankomun batekiko leialtasunak. Horra hor bizitzaren indar bateratzaileen bulkadapean gizateria abiatzen ari den helmuga.
 

Datozen orrietan: 

• Nazio amankomunitate baterako osagaiak [77. orr.]
• Bahá'u'lláh-ren Santutegia  [78. orr.]

"Bahá'í-ak, Nazioarteko Bahá'í Erkidegoaren publikaziotik hartutako testua".

Atzera  |  Gora |  Hurrengora