1- 800 - 22 - UNITE

Bahá'í Fedeari buruzko informazioa Estatu Batuetan

Bahá'í-ak

magazinari buruz

Mundu Ordena Berri baterantz

BAHÁ’U’LLÁH ETA HAREN MUNDU IKUSPEGIA

Bahá’í-ak sinetsita daude mende honetan gertaturiko itzelezko aldaketek -eta orain bertan gertatzen ari direnek- bulkada hartu dutela Jainkoaren Mezulari berri baten etorreraz, eta Errebelazio berri baten argiaren eragina dutela. 

Duela urte gutxi batzuk, “mundu ordena berria” esaldia ostera sartu zen jendearen eguneroko hizkeran.  

1988an, Sobiet Batasuneko orduko lehendakari zen Mijail Gorbachov Nazio Batuen aurrean mintzatu zen “adostasun unibertsal” bat lortzeko premiaz, gizateria “mundu ordena berria” baterantz zihoalako. 1990ean, Estatu Batuetako orduko lehendakaria zen George Bushek terminoaz baliatu zen nazioen artean Gerra Hotzaren ondoren lortutako elkarlan maila berria deskribatzeko, batez ere Golko Pertsiarrean gertatutako agresioari aurka egiteko Nazio Batuek erakutsitako jarreraz ari zela. 

Geroztik, esaldia zabaldu egin da zirkulu akademikoetara eta kazetarien artean. Munduko buruzagiek ere bereganatu egin dute. Terminoak itxuratu egiten ditu gure planetaren antolamendu sozial eta politikoari buruzko eztabaidak. Eztabaida horiek gorabehera, mundu ordena berriak ez du oraindik definizio errealik. Sortu egin dela begien bistako gauza da; xehetasunak, ordea, zirriborratu besterik ezin dira egin. 

Bahá’í-entzat, “mundu ordena berria” esaldiak esanahi argi eta berezia du. Duela 100 urte baino gehiago, Bahá’u’lláhk hitz horiexek erabili baitzituen munduko bizitzaren alor politiko, sozial eta erlijiosoan aldaketa erabakigarri sorta bat adierazteko. “Asaldaketa eta kaos gertuen seinaleak orain nabari daitezke, indarrean dagoen Ordena, tamalez, akastuna dela ikus baitaiteke”, idatzi zuen. “Luze gabe, egungo ordena bildu egingo da, eta haren ordez beste bat, ordena berri bat, zabalduko da”.  

Bahá’í-ak sinetsita daude mende honetan gertaturiko itzelezko aldaketek -eta orain bertan gertatzen ari direnek- bulkada hartu dutela Jainkoaren Mezulari berri baten etorreraz, eta Errebelazio berri baten argiaren eragina dutela. Beharbada halakorik esatea sinesmen ekintza handi bat da. Baina Jainkoa existitzen bada eta Haren ordezkariak lurra zapaldu baldin bazuen duela mende bat, begien bistakoa da Haren presentziaren eragina Haren bizitza fisikoaren horizontetik haratago zabaltzen dela. 

Beraz, bahá’í-entzat mundu ordena berri baten ideiak berrantolaketa politikoa, munduko buruzagi gutxi batzuei ikuspen bat aldarrikatzea edo akademiko gutxi batzuen konstrukzio juridiko-legezkoak baino askoz gehiago hartzen du barne. Izan ere, Bahá’u’lláhk deskribatutako “Sistema” baita, alegia, Haren printzipio eta irakaspenen ezarpena. Mundu ordena berriak, Bahá’í Fedeak bezalaxe, giza jarduera guztiak hartzen ditu barne, esfera sozial eta politikotik eguneroko gure komunitate herremanetaraino, harremanok izaera kultural, izpiritual zein ekonomikokoak direla ere. Finean, barne eta kanpo berrantolaketa da.  

Bahá’í-ek lanean dihardute ikuspen handi horren gauzatzea aurreratzeko. Funtsean, Isaiasen ikuspen biblikoa da, gizakiak “beren ezpatak golde eta beren lantzak aihotz bilakatu (...) eta inoiz gehiago gerran ariko ez diren” garaikoak. Horixe irrikatu izan dute kristauek mendeetan barrena, Jainkoaren Otoitza errezitatzean Jainkoaren Erresumaren etorreraren lekukotasuna ematen dutenean: “Etor bedi guregana zure Erresuma. Egin bedi zure borondatea, zeruan bezala lurrean ere”. 

Era berean, ikuspen horrek Jainkoaren justiziaren argiak egunen batean lur osoa estaliko duela dioen promesa islamikoaren zentzu bera du: “Ez duzu bertan ikusiko ez mendirik ez sakanik”.  

Transizio historiko honen haziak mundu ordena berria iragartzen duten aldaketa eta transformazioetan suma daitezke, eta milaka eratan nabarmentzen dira: emakumearen eta gutxiengoen berdinketarako joerak mende bateko existentzia du; duela mende bat ere ari da markatzen justizia ekonomiko berri baterako joera, hartara klase eta aberastasun desberdintasun tradizionalki itzelen deuseztapena lortuko delarik; finean, interdependentzia globalerantzako ehun urteko joera.  

Bahá’u’lláhk aurreikusi egin zituen joera horiek. Gizateriaren eraldaketa hurbilaz mintzatu zen, eta aro berri honetan aurrerabide soziala bultzatuko luketen printzipio eta xedapenen hezurdura aldarrikatu zuen. 

Idealista handi askok sustatzen dituzte gaur egun antzeko printzipio eta ideiak; eta hala da, ohartarazi den moduan: Bahá’u’lláhren irakaspen sozialak gizarte aurrerakoi baten definizio modernoaren sinonimoak dira.  

Alabaina, ideia sozial multzo berri baten aldarrikapen hutsa ez da berez aski mundua eraldatu eta mundu ordena berria sortzeko, oraindik orain komunismoaren gainbeherarekin ikusi den bezala. 

Mundu ordena berria eraikitzeko modu bakarra pertsonaren errealitate izpiritualaren ulermen sakon baten gainean oinarritzea da, errealitate hori gure izateen funtsean bertan aurkitzen baita. 

Batasuna eta harmonia sortu, ulermena eta zorroztasuna ekarri eta lankidetzako enpresak ahalbidetzen dituzten giza kualitate horien iturburua mundu izpirituala da. Kualitate horien artean maitasuna, kemena, ikusmena, sakrifizioa eta apaltasuna daude. Kualitate horiek, funtsean izpiritualak, giza elkartearen zimendu ikustezin baina oinarrizkoa dira. Kualitate izpiritualak garapen sozialarekin lotzen duten estekadurez mintzatzean, ez da ahaztu behar maisu erlijiosoek iraganean nola gidatu zuten gizateria. Hamar Aginduen kode morala eta Urrezko Araua (norberarentzat desiatzen dena besteentzat desiatzea) present daude tradizio erlijioso ia guztien irakaspenetan, eta erakusgarri fidela dira, bi funtzio betetzen dituztelako: gidalerro moralak dira eta hobetze izpirituala aldarrikatzen dute. Haien eraginak nonahi giza kontzientzian sartu eta kulturak berregituratu egin ditu. Sinesgabearentzat ere nabarmen agertzen da halako irakaspenen balioa.  

Iraganean, irakaspen izpiritualak pertsonaren ekintzetan edo talde erlatiboki txikietan harmonia ezartzen kontzentratzen ziren. Gaur egun, izpiritualtasuna ikusteko gure moduak ez ditu soilik bizitza pertsonal eta taldekoa barne hartu behar, baizik eta gizateria osoaren aurrerabide kolektiboa ere bai. Areago, gizateria helduaroan sartu delako preseski, bake eta justizia aro bati buruzko behialako profeziak orain ari dira errealitate bihurtzen.  

Bahá’u’lláhren funtsezko mezua batasunerako deia da; haren entzulegoa, mundu osoa: “Zuen ikusmena mundu mailakoa izan dadila, zeuen pertsonei mugatua baino gehiago”. Haren heriotzatik mende bat pasa den honetan, dei hori itxura hartzen hasi da giza generoaren mikrokosmos bat den eta lurreko ia bazter guztietan finkatuta dagoen komunitate batean. 

Bahá’í komunitatearen sorrerak modu konbentzigarrian erakusten du gizateriak, bere dibertsitatean, herri bat bezala eta aberri bakar batean bezala bizitzen eta lan egiten ikas dezakeela. Argudio indartsu bat ekartzen du orobat era serio eta hotz batez azter daitezen Pertsona berebiziko Haren asmoak, Haren izpirituak sortu eta sostengatuak. 

Datozen orrietan: 

• “Nazioen arteko areriotasunak, gorrotoak eta azpijokoak bertan behera geldituko dira (...)”  [75. orr.]
• Nazio amankomunitate baterako osagaiak [77. orr.]
• Bahá'u'lláh-ren Santutegia  [78. orr.]

"Bahá'í-ak, Nazioarteko Bahá'í Erkidegoaren publikaziotik hartutako testua".

Atzera  |  Gora |  Hurrengora