1- 800 - 22 - UNITE

Bahá'í Fedeari buruzko informazioa Estatu Batuetan

Bahá'í-ak

magazinari buruz

Esentzia ezagutezina

Bahá’í-ek Jainkoarekiko, erlijioarekiko eta hurkoarekiko harremana nola ulertzen duten adierazteko modurik onena bahá’í-ek “Jainkoa”z duten kontzeptutik abiatzea da. Hasteko, kontzeptu horrek Jainkoa funtsean ezagutezina dela aitortzera eramaten du. 

Bahá’u’lláhk irakasten du Jainkoa Unibertsoaren sortzailea dela, eta haren zuzendaria. Jainkoaren izaera mugagabea da, azkengabea eta ahalguztiduna. Horrenbestez, ezein izaki hilkor, gizon zein emakume, uler dezake bere intelekto eta ahalmen mugatuaz Jainkoaren errealitatea, haren motibu eta jardunmoldeak. 

Esentzian ezagutezina izateak ez du eragozten Jainkoak gizateriari Bere buruaren berri ematea Mezulari Jainkotiar sorta baten bidez, zeinak Harengana hurbiltzeko bide bakarra baitira. Haien artean daude erlijio handi guztien Fundatzaileak: Moises, Krishna, Zoroastro, Buda, Kristo eta Mahoma, ezagunenak aipatzearren.  

Bahá’í-ek Noe eta Abraham ere profetatzat jotzen dituzte. 
 

“Garai honetan, bizitza berri bat mugitzen ari da lurreko herri guztien barnean”. Bahá’u’lláh

 

Mezulariak, Bahá’u’lláhren hitzetan, “Jainkoaren Adierazpenak” dira. Adierazpenak ispìlu ezin hobeak dira, bertan islatzen baitira Jainkoaren atributu zein perfekzioak; hartara, borondate jainkotiarraren komunikazio kanal bilakatzen dira gizateriarentzat. 

Aipatu ideia horri -hots, Jainkoak Bere Mezulariak bidali izana gizateria hezitzeko- “errebelazio progresiboa” esaten zaio. Analogia batez esan nahi baldin bada: haurrak beren lehenbiziko eskola urteetan ideia sinpleak bereganatzen hasten diren bezala, jakintza konplexuak hurrengo mailetan hartuz doazelarik, era berean gizateria “hezi” du Jainkoaren Mezulari sorta batek. Garai bakoitzean, Jainkoaren mezularien irakaspenak gizateriak iritsitako heldutasun kolektibo mailara egokitzen dira. 

---

Bi erreferentzia

Jainkoaren Adierazpenek bi erreferentzia dituzte. Alde batetik, Jainkoaren borondatea hutsik gabe islatzen duten izaki jainkotiarrak dira. Bestetik, gizakiak diren aldetik jaio, gaixotu, nozitu eta hil egiten dira. Gizateriari haren historiaren etapa desberdinetan zuzentzen zaizkion izaki desberdinak dira. Diferentzia horiei zor zaizkie neurri batean erlijioetan sumatzen diren kultur desberdintasunak, baina desberdintasun horiek beren berezko batasuna neurri batean ezkutatzen dutelarik. 
 

“Jainkoaren hitzak munduaren bihotza irazeki du; zein tamalgarria izango litzateke haren garrez erretzen huts egingo bazenute”.  Bahá’u’lláh.

“Jainko Ahalguztidun eta Sortzaile Paregabeak lurreko herrietara bidaltzea erabaki duen Profeta bakoitzari Mezu bat eman zaio, eta agertu den garaiari hobekien datorkion eran jardutea agindu zaio”, dio Bahá’u’lláhk. 

Funtsean, ordea, Jainkoen Mezularien mezu izpirituala berdina da unibertsalki. Haietako bakoitzak azpimarratu egin du Jainkoa maitatzearen, Haren borondatea betetzearen eta gizateriarenganako maitasunaren garrantzia. Hitz desberdinez baliatu badira ere, bakoitzak “Urrezko Araua” irakatsi du: gizakiek besteak tratatzea berek tratatuak izan nahi luketen bezala.  

“Jakin ezazue segurtasun osoz Jainkoaren Profeta guztien esentzia bat eta bera dela”, idatzi zuen Bahá’u’lláhk. “Batasun hori erabatekoa da. Jainko Sortzaileak adierazi zuen: Ez dago inongo bereizketarik Nire Mezuaren eramaileen artean (...)”. 

Jainkoaren Adierazpenek errebelazio jainkotiarraren bidez helarazten diote gizateriari Jainkoaren borondatea. Prozesu hori gizateriaren liburu sakratuetan agertzen da, Toratik Koraneraino, haien artean sartzen direlarik eskritura hindu, budista, kristau eta zoroastroarrak. Idazki horiek Jainkoak gizateriari errebelatutako hitzaren errejistroa dira.  

Bahá’u’lláhk dio Jainkoaren Hitzak “orotariko giltza” moduan obratzen duela munduan. Hark bakarrik iratzar dezake pertsona guztiengan ezkutatuta dagoen potentzial izpirituala. Jainkoaren hitzik gabe, gizakiek instintuen eta baldintzapen kulturalen gatibu jarraituko lukete, eta arreta gehiago eskainiko liekete biziraupen fisikoarekin lotutako kualitateei. Gutizia, egoismoa, zintzotasun eza, ustelkeria eta beste zenbait biziok aurrera egiten dute Jainkoaren zuzendaritza falta den lekuan. 
 

“Antzinako Izakiaren jakintzaren ateak itxita egon dira gizakien begietara, eta betiko jarraituko dute itxita. Ezein gizakiren ulermen ezingo da Haren Gorte santura iritsi ere. Alabaina, Bere errukiaren erakusgarri gisa, eta Bere ontasun maitagarriaren adierazgarri gisa, Hark Bere gidari- tza jainkotiarraren Astroak eta Bere batasun jainkotiarraren Sinboloak adierazi dizkie gizakiei, baita agindu ere izaki santifikatu horien ezagutza Beraren ezagutzaren identikoa izan dadila... Haietako bakoitza mundu hau goiko erresumekin lotzen duen Jainkoaren Bidezidorra da”. Bahá’u’lláh

 

Bahá’í-entzat, Bahá’u’lláhk idatzitako liburu, ohol eta gutunak garai honetarako berritutako Jainkoaren Hitza dira. Bahá’u’lláhren idatziak, nahiz bat datozen iraganeko errebelazio erlijiosoekin, eta “Jainkoaren fede aldaezina, eternala iraganean eta eternala geroan” diren, egia berriak dakartzate Jainkoak egungo gizateriarentzat duen asmoen inguruan. 

Datozen orrietan: 

• Mezulari Jainkotiarrak [34. orr.]
• Jainkoaren generoa [34. orr.]
• Zerua eta infernua: bahá’í-ek heriotzaren osteko bizitzaz duten ikuspuntua [35. orr.]
• Otoitza eta meditazioa [36. orr.]
• Bahá’í-ek beste erlijioak nola ikusten dituzten [37. orr.]
• Bahá’í Gurtza Etxeak [38. orr.]

 

"Bahá'í-ak, Nazioarteko Bahá'í Erkidegoaren publikaziotik hartutako testua".

Atzera  |  Gora |  Hurrengora

Haurrak beren lehenbiziko eskola urteetan ideia sinpleak bereganatzen hasten diren bezala, jakintza konplexuak hurrengo mailetan hartuz doazelarik, era berean gizateria “hezi” du Jainkoaren Mezulari sorta batek, haien artean Moises, Krishna, Zoroastro, Buda, Kristo eta Mahoma. Bahá’u’lláh azkenekoa da “Hezitzaile Jainkotiar” horien artean. Argazkian, euskolaurreko gela bat Brasileko bahá’í eskola batean.