1- 800 - 22 - UNITE

Bahá'í Fedeari buruzko informazioa Estatu Batuetan

Bahá'í-ak

magazinari buruz

Bahá'ulláh-ren Idazkiak

Ez da inoiz lehenago izan gizateriaren egungo egoeraren ezaugarri kritikoak halako zehaztasunez deskribatu duen iragarle, futurista edo profetarik. 

Bahá’u’lláhren Idazkien ezaugarri berezietako bat da nolako zehaztasunez deskribatzen dituzten gizateriak gaur egun aurre egin beharreko gai funtsezkoak. 

Bere idazlanetan, Bahá’u’lláhk munduaren ordena sozialaren erabateko berregituratzearen alde egin zuen. Bizitzaren alderdi guztietan izan behar zuen eragina berritzeak, hala nola: ekonomia, Gobernua, komunitatearen garapena eta praktika erlijiosoa. 

Bahá’u’lláhren idazkiek jorratzen duten gai nagusia honela labur daiteke: gizateria bakarra da, eta iritsi da gizarte berri batean bat egin dezan garaia. Eutsi ezineko prozesu historiko bati esker, arraza, klase, sinesmen, fede eta nazio mailako langa guztiak bertan behera eroriko dira. Halako prozesuaren pizgarri diren indarrek -diosku Bahá’u’lláhk- zibilizazio unibertsal bat sortuko dute. Gaur egun gure planetak nozitzen dituen krisialdiek modu gordinean erakusten dute beharrezkoa dela herrialde guztiek gizateria berberaren zati direla onartzea eta benetan bat egindako gizarte global bat lortzeko helburuz lan egitea.  

Bahá’u’lláhk halako zibilizazio baten oinarri izan beharko duten printzipio gidarietako batzuk deskribatu zituen. Haien artean dira: aurreiritzi mota guztiak alde batera uztea; bi generoen arteko erabateko berdintasuna; erlijio handien arteko funtsezko batasuna aitortzea; muturreko aberastasun eta pobrezia desagertaraztea; heziketa unibertsala; zientziaren eta erlijioaren arteko harmonia; naturaren eta teknologiaren arteko oreka eutsigarria; etika pertsonalaren iritzi garaia eta segurtasun kolektiboan zein gizateriaren batasunean oinarritutako mundu mailako sistema federal baten finkatzea. 

Printzipio horiek, zenbait arazo elkarrekin lotuta aztertzen dituztenez, hala nola, emakumearen funtzioa, arraza arteko harremanak, justizia ekonomikoa, inguramenaren degradazioa eta mundu ordena, ilustratu egiten dituzte mende honetako mugimendu dinamikoenetako baten bizigarri izan diren kezkak. Eta kezka horiek leku nagusia hartu dute gizateriak konpondu beharreko auzi zerrendan. 

Ez da inoiz lehenago izan gizateriaren egungo egoeraren ezaugarri kritikoak halako zehaztasunez deskribatu duen iragarle, futurista edo profetarik. 

Bahá’u’lláhk aztertutako arazoak ez dira zaharkitu; aitzitik, gizateriaren gaur egungo bizitza kolektiboan arazo nagusiak dira.  

Batasuna helburu

Bahá’í Fedearen izaera progresiboak Bahá’u’lláhk batasunari emandako garrantzian ditu sustraiak. Egia esan, Haren irakaspenak hitz bakar batean laburbildu beharko balira, “batasuna” izango litzateke hitz hori. 

Bere idazkietan, Bahá’u’lláhk agerian jarri zuen batasunaren garrantzia -eta errealitatea-. Lehenengoz eta behin, Jainkoa bakarra da. Munduko erlijio handi guztiak erlijio bakarra dira, Jainkoaren Mezulariek igorritako Jainkoaren hitz eta borondatearen errebelazioari gizateriak emandako erantzun desberdinak islatzen baitituzte. Horixe da, funtsean, gainerako bahá’í irakaspenen oinarrian dagoen batasun kontzeptua.  

Beste zenbait printzipiok Jainko eta erlijio batasun kontzeptuan dute abiapuntua. Esaterako, Bahá’u’lláhk irakasten du pertsona guztiek, Jainkoak sortutakoak diren aldetik, herri bakar bat osatzen dutela. Ikuspuntu horretatik ikusita, arraza, nazio, klase edo jatorri etniko mailako bereizketak iragankorrak suertatzen dira. Era berean, baztertu beharra dago banako, tribu, probintzi zein nazio nagusitasunean oinarritutako edozein nozio. Jainkoaren ahotsak, Bahá’u’lláhren ahotik mintzatuz, honako hau aldarrikatzen du: “Ez al dakizue zergatik sortu zaituztegun guztiak hauts berberetik? Inor besteen gainetik laineztu ez dadin. Gogoeta egin ezazue zeuen bihotzean nola izan zineten sortuak. Denok lehengai berberaz egin zaituztegunez, arduratu behar duzue arima bakarra izaten, oin berberekin ibiltzen, aho berberaz jaten eta lur berean bizitzen, hartara zuen izate barne-barnekoenek eta zuen ekintza eta obrek agerian jarriko baitituzte batasuna eta eskuzabaltasunaren funtsa.   jarraituko da

"Bahá'í-ak, Nazioarteko Bahá'í Erkidegoaren publikaziotik hartutako testua".

Atzera  |  Gora |  Hurrengora

Bahá’u’llák irakatsitako giza generoaren batasunaren isla bat: Pangchani-ko (India) Aro Berriaren Eskolako ikasleak munduko bazter guztietatik datoz